| sunnuntai, syyskuuta 04, 2005 |
| At 3:02 pm a flock of snow-white doves rose into the air and flew across the island. |
Ég var í heimsókn í Reykjavík og um leið einhversstaðar í íslenskri sveit, en þó í Danmörku, tókst einhvernveginn að mölva tvíviðgerðar framtennurnar mínar og stóð í fólksfjölda menningarnætur í miðborginni með munn og lófa fulla af beinhvítum brotum, mamma og ég, ráðalausar, ég mállaus að auki svo hún leitaði upplýsinga meðal vegfarenda um hvar mætti finna bráðamóttöku danskra tannlækna en mér var nokk sama því innan skamms myndi Beck halda tónleika í Lækjargötu.
Talandi um drauma, þá var ég að lesa Sandman, Endless nights nánar tiltekið (sjá tilvitnun að ofan). Davíð gaf mér hana, í einhverja jólagjöf ef ég man rétt og ég hafði einhvernveginn aldrei komið því í verk að lesa hana svo ég tók hana með hingað. Hef ekki lesið aðrar Sandmanbækur, langar til þess, núna.
Á morgun fer ég í fyrsta tímann í Københavns Universitet, í kúrsinum Russian masterpieces, sem einsog sjá má er kenndur á ensku. Það lítur út fyrir að ég muni hugsanlega bara taka bókmenntakúrsa á ensku á þessari önn, einfaldlega vegna þess að þeir vekja frekar áhuga minn en þeir á dönsku. Þegar ég sótti um í vor varð ég að byrja á að finna kúrsa á heimasíðu KU (sem voru þó allir síðan í fyrra þar sem plan þessa vetrar var ekki komið inn) og bera þá undir skorarformann bókmenntafræði í HÍ til samþykktar. Þá virtist það vera skilyrði fyrir því að HÍ sendi út umsókn fyrir mig á sínum vegum að þau hefðu fyrirfram samþykkt alla kúrsa sem ég myndi taka, svo það væri nú á hreinu að þau myndu meta þá til eininga þegar þar að kæmi og blablabla, en nú hefur það hinsvegar sýnt sig að ég má taka nokkurnveginn hvað sem mér sýnist, sem ég og ætla mér að gera og nenni eiginlega minnst að hafa áhyggjur af matsatriðum framtíðarinnar.
Hér er annars allt gott, veðrið hefur verið frábært og fólkið enn betra. Ég bý með Gunnu, Lan, Önnu, Símoni, Kobba, Matta og Pipp, í augnablikinu á Søndergårdsvej. Það er nokkurnveginn á milli Søborg og Emdrup, segi það nokkrum nokkuð, og eiginlega frekar langt frá öllum þeim stöðum sem ég hef nokkuð á að sækja, allavega nógu langt til að ég leggi ekki í að hjóla á meðan ég rata eins illa og núna en það verður þó ekki vandamál miklu lengur. Við flytjum nefnilega til Frederiksberg á næstu viku eða tveimur, sem er tiltölulega miðsvæðis og rétt hjá Vanløse, þar sem Hafdís heldur til. Ég keypti semsagt hjól á föstudaginn, það er blátt og fallegt og góð tilbreyting frá árans fjallahjólunum sem tröllríða markaðnum heima, með alltof mörgum gírum og engum keðjuhlífum, bjöllum, körfum eða álíka nauðsynjum. Hef tekið hjólið í lestina heim og að heiman, sem gengur slysalaust, en ég hlakka til að flytja. Það er svo gott að hjóla þar sem gert er ráð fyrir hjólreiðafólki, í Reykjavík þarf yfirleitt að meta sjálfur hvort maður sé minna óvelkominn á götunni eða gangstéttinni (þar sem eru gangstéttir á annað borð) og endalaust upp og niður og á móti vindi og svo framvegis, get ekki sagt að ég sakni þess.
Fórum á Louisiana-nýlistasafnið í dag, þar var sýning á verkum Matisse.
Ég bý kannski enn í ferðatösku, í kaffibolla, en ég hef það allavega gott þar. |
Erla Elíasdóttir @ 10:49 ap.  |
|
|
|
